Më 6 dhjetor, udhëheqësit e Bashkimit Europian ndaluan në Shqipëri në një takim sa historik, aq edhe simbolik. Samiti i fundit BE-Ballkani Perëndimor, i mbajtur në Tiranë, ishte i pari që u mbajt në një rajon, qytetarët e të cilit masivisht dëshirojnë t'i përkasin klubit të Brukselit, por kanë filluar të ngrenë dyshime nëse do të bëhen ndonjëherë pjesë e këtij klubi. "Gjërat po ndryshojnë," vuri në dukje kryeministri i Shqipërisë, Edi Rama, në përfundim të samitit, ndërsa liderët e tjerë përshëndetën "një mentalitet të ri". Disa javë më vonë, Bosnje-Hercegovinës iu dha statusi i vendit kandidat për t'u anëtarësuar në BE. Humori i ri i BE, shkruan The Guardian, nuk është e vështirë të shpjegohet. Lodhja nga zgjerimi i BE-së dhe tensionet në dukje të pazgjidhshme të Ballkanit Perëndimor hoqën vëmendjen e Brukselit nga rajoni. Por, lufta në Ukrainë i ka përqendruar mendjet në Bruksel, pasi Rusia kërkon të zgjerojë ndikimin e saj në rajon në kurriz të BE-së dhe NATO-s dhe përdor paqëndrueshmërinë politike të rajonit në avantazhin e saj. Ky fokus i ripërtërirë perëndimor është shumë i nevojshëm, por kërkohet më shumë se fjalë veç fjalë të ngrohta. Marrëdhëniet midis Prishtinës dhe Beogradit – e cila gëzon mbështetjen entuziaste të Kremlinit dhe refuzon të njohë pavarësinë e Kosovës – duken më keq se në çdo moment gjatë 20 viteve të fundit.