Bashkimi Europian tha se vendimin i Kosovës që të hapë ambasadën e saj në Jerusalem, qytet të cilin BE-ja e konsideron me status të pazgjidhur, është për të ardhur keq. Peter Stano, zëdhënësi i bllokut europian, u shpreh ne një konference për shtyp se pret nga Kosova që të veprojë në bazë të deklarimeve për integrimet evropiane si qëllim strategjik. “Në përgjithësi është gjithmonë e mirëseardhur kur parterët tanë të jashtëm normalizojnë raportet mes tyre. Por kur është fjala e hapjes së ambasadës në Jerusalem, ky është një vendim për të ardhur keq sepse e largon Kosovën nga qëndrimet e BE-së për statusin e Jerusalemit. Të gjitha ambasadat e vendeve anëtare të BE-së dhe delegacioni i BE-së janë në Tel Aviv dhe kjo është në përputhje me rezolutën e Kombeve të Bashkuara dhe vendimet e Këshillit të Bashkimit Europian. Statusi i Jerusalemit si kryeqytet i të dyja shteteve është qëndrim i BE-së, i cili nuk ka ndryshuar” tha Stano. I pyetur se cfarë të drejte ka BE-ja të ndërhyjë në një rast të tillë kur ajo nuk ka raporte diplomatike me bllokun, zëdhënësi përsëriti qëndrimin se kontaktet si vend partner janë të rregullta. “Ne nuk kërkojmë nga Kosova të bëjë apo të mos bëjë diçka. Por themi se nëse pretendoni se keni qëllim strategjik integrimin në BE, atëherë ekziston korniza në bazë të së cilës duhet të veproni. Pra, vetëm themi se ju duhet të veproni në bazë të asaj që vetë keni deklaruar” ishte komenti I tij.