“Panterat Rozë” ishte nofka që iu vu nga INTERPOL një rrjeti ndërkombëtar hajdutësh që vidhnin argjendari dhe ora. Ky rrjet kishte rreth 200 anëtarë dhe ndihmës (plus edhe shumë bashkëpunëtorë të tjerë), dhe gati të gjithë vinin nga Ballkani perëndimor. Ky grup ishte autor i disa prej vjedhjeve më të mëdha dhe më të guximshme të argjendarive dhe gurëve të çmuar të të gjitha kohërave, dhe zhvillonte aktivitetin e tij në disa shtete dhe në disa kontinente. Sipas burimeve të ndryshme, ky grup ishte përgjegjës për vjedhjen e më shumë se 350 milionë eurove në ar dhe diamante. Kishte dyshime se disa nga grabitjet e kryera nga ky grup mund të ishin porositur nga persona të tretë në shtete të pasura të Evropës. Shumë nga anëtarët e grupit flisinin disa gjuhë të huaja, mbanin me vete disa pasaporta të rreme. Ata kishin përvojë e stërvitje ushatarake, dhe disa prej tyre kishin një të kaluar të dhunshme që nga koha e luftërave në Jugosllavi. Sipas një personi që kishte lidhje me këtë rrjet, një nga arsyet e angazhimit të disa personave në aktivitet kriminal ishin inati dhe hakmarrja. Duket se Panterat Rozë ishin më tepër një rrjet, sesa një grup i mirëfilltë i krimit të organizuar, pa krerë apo udhëheqje të përcaktuar qartë. Sipas një personi që e njihte mirë këtë rrjet, “struktura organizative e Panterave i ngjasonte një oktapodi”. Brenda grupit kishte edhe persona më të rëndësishëm se pjesa tjetër, dhe që mund të konsiderohen si hajdutë ‘mjeshtra’, por nuk është se ata ushtronin ndonjë autoritet apo kontroll mbi anëtarët e tjerë të rrjetit kriminal.