Shtetet e Bashkuara të Amerikës po shqyrtojnë mundësinë e vendosjes së sanksioneve ndaj Gjykatës Ndërkombëtare Penale, pas kërkesës së prokurorëve të këtij institucioni për të nxjerrë urdhër-arrest ndërkombëtar ndaj Kryeministrit izraelit, Benjamin Netanyahu. Prokurorët akuzojnë Netanyahun, ministra të kabinetit të tij dhe udhëheqësit e Hamasit nga krahu i palestinezëve për krime lufte në konfliktin e Gazës. Sekretari i Departamentit të Shtetit, Antony Blinken tha se administrata e Presidentit Biden është e gatshme që të punojë me kongresin për ndërmarrjen e sanksioneve të mundshme kundër zyrtarëve të Gjykatës Penale Ndërkombëtare. Duke folur në një seancë të Komisionit të Marrëdhënieve me Jashtë të Senatit, Blinken e quajti masën "thellësisht të gabuar" dhe tha se ajo do të ndërlikonte perspektivat e arritjes së një marrëveshjeje për pengjet dhe një armëpushim në konfliktin e Izraelit me Hamasin. Prokurori i gjykatës ndërkombëtare Penale, Karim Khan tha të hënën se kishte baza të arsyeshme për të besuar se kryeministri izraelit Benjamin Netanjahu, Sekretari i Mbrojtjes i Izraelit dhe tre udhëheqës të Hamasit "mbajnë përgjegjësi penale" për krime të dyshuara lufte dhe krime kundër njerëzimit.