Një aksident i rëndë me pasojë vdekjen është regjistruar në orët e vona të së hënës në Durrës. Ngjarja ndodhi rreth orës 23:55, afër zonës së njohur si “Katër Rrugëve të Shijakut”, në fshatin Pjezë. Sipas të dhënave paraprake, dyshohet se shpejtësia dhe mungesa e ndriçimit në rrugë kanë qenë faktorët kryesorë që çuan në përplasjen fatale. Një automjet tip Volksëagen, i drejtuar nga një 19-vjeçar me banim në Shijak është përplasur me një Ford, që drejtohej nga një 26-vjeçar nga Sukthi. Përplasja ka qenë fatale për 26-vjeçarin me inicialet G. K., i cili humbi jetën në vendngjarje. Ndërkohë, drejtuesi i automjetit tjetër, shtetasi F. R., ndodhet në spital nën kujdesin e mjekëve dhe mbikëqyrjen e Policisë, pasi ndaj tij do të vijojnë procedurat ligjore lidhur me aksidentin. Grupi hetimor po punon për të sqaruar plotësisht rrethanat dhe shkaqet e ngjarjes tragjike.