Dy vajza të reja kanë gjetur vdekjen dhe një tjetër ka mbetur e plagosur si pasojë e një aksidenti të rëndë rrugor të ndodhur në orët e mbrëmjes së të dielës në rrugën Delvinë-Sarandë. Aksidenti ka ndodhur rreth orës 20 e 15 minuta në vendin e njohur si Pularia. Në këtë zonë, një automjet tip Audi, drejtuar nga 23-vjeçari me inicialet K.N., është përplasur me automjetin tip Lançia, me drejtuese 22 vjeçaren me inicialet E.Dh. Si pasojë e aksidentit, kanë humbur jetën drejtuesja e automjetit “Lancia”, shtetasja E. Dh., 22 vjeçe, së bashku me pasagjeren, shtetasen me inicialet R. Dh., 20 vjeçe, ndërsa pasagjerja tjetër në këtë automjet, shtetasja me inicialet, A. Zh., 24 vjeçe ka mbetur e dëmtuar dhe ndodhet nën kujdesin e mjekëve. Forca të shumta policie kanë mbërritur në vendin e ngjarjes, teksa po hetohen shkaqet e aksidentit. Paraprakisht dyshohet se shkak i aksidentit ka qenë shpejtësia e lartë e lëvizjes së automjetit tip Audi dhe një manovër e gabuar në rrugë e drejtuesit të saj.