Ministrja virtuale ‘Diella’ rrëmbeu protagonizmin në samitin e komunitetit politik europian. Gazetarët e mediave prestigjoze ndërkombëtare e vunë kryeministrin Edi Rama përballë kritikave që integrimi i inteligjencës artificiale në qeveri ka marrë gjatë ditëve të fundit. Dublim Rama: “Dëgjoni, kjo është diçka e re dhe, si çdo gjë e re, duhet të përballet edhe me kritika. Kjo është një gjë e mirë. Por deri tani kemi prova që funksionon, dhe funksionon shumë mirë. Ka nisur si një asistente virtuale për shërbimet publike për qytetarët. Së dyti, po përdoret për përshtatjen e legjislacionit të Bashkimit Europian me legjislacionin tonë, për të ndjekur bisedimet e anëtarësimit të Shqipërisë në BE. Dhe së treti, tani po zgjerohet për t’u përdorur edhe në prokurimet publike, edhe pse kjo është ende një punë në proces.”