Administrata publike po fryhet në numër punonjësesh vit pas viti dhe prirja është drejt rritjes së numrit të posteve drejtuese. Sipas të dhënave zyrtare për periudhën 2019–2024, të analizuara nga Monitor, numri total i të punësuarve në shtet është rritur me rreth 10 mijë persona. Nga 172,745 të punësuar në vitin 2019, administrata shkoi në 182,430 persona në vitin 2024. Por, zgjerimi nuk ka ndodhur në mënyrë të barabartë në të gjitha kategoritë. Më të favorizuarit kanë qenë ligjvënësit, nëpunësit e lartë dhe drejtuesit të lartë, të cilët janë shtuar me mbi 6,600 vetë, me rritje me gati 47 për qind brenda pesë vitesh. Pesha e drejtuesve në administratë është zgjeruar dukshëm në totalin e të punësuarve në këtë sektor me 11.2 për qind në 2024 nga 8 për qind që ishte në vitin 2023. Numri i specialistëve ka qenë relativisht i qëndrueshëm, duke u luhatur pak gjatë viteve dhe duke përfunduar në një nivel pak më të ulët në vitin 2024 krahasuar me 2019-ën, por rënia më e fortë ka ndodhur tek nëpunësit e thjeshtë, të cilët kanë rënë me gati 1 mijë vetë në 2024 në krahasim me vitin 2019.