Vdekja e një teknikeje 28-vjeçare në një institut kërkimor kundër murtajës në Irkutsk të Rusisë ka ngritur dyshime për një infektim të mundshëm me murtajë pneumonike. Megjithatë, autoritetet ruse nuk e kanë konfirmuar se shkak i vdekjes ka qenë bakteria Yersinia pestis. Eksperti Brendan Wren, profesor i patogjenezës mikrobike në Shkollën e Higjienës dhe Mjekësisë Tropikale në Londër, tha për Radio Evropa e Lirës se murtaja pneumonike përhapet përmes rrugëve të frymëmarrjes, por nuk konsiderohet një sëmundje veçanërisht ngjitëse. Sipas tij, nëse rasti në Rusi konfirmohet si murtajë pneumonike, bëhet fjalë për një infektim të izoluar dhe jo për një shpërthim epidemik. Ai e konsideroi izolimin dhe monitorimin e personave që mund të kenë qenë në kontakt me të infektuarën si masa të arsyeshme parandaluese. Murtaja pneumonike është një sëmundje serioze dhe mund të përparojë shumë shpejt. Antibiotikët mund të jenë efektivë nëse trajtimi nis në kohë, ndërsa vonesa në mjekim rrit ndjeshëm rrezikun për jetën. Eksperti paralajmëroi gjithashtu për raste të raportuara të shtameve të Yersinia pestis me rezistencë ndaj disa antibiotikëve.