Më shumë se 900 tërmete kanë tronditur një zinxhir ishujsh të largët dhe me popullsi të rrallë në Japoninë jugore gjatë dy javëve, duke i mbajtur banorët të shqetësuar dhe zgjuar gjithë natën. Aktiviteti sizmik ka qenë "shumë i lartë" në detet përreth ishujve Tokara që nga 21 qershori, thanë autoritetet pas një tërmeti me magnitudë 5.5 ballë të shkallës Rihter që u regjistrua të mërkurën. Nuk ka pasur raportime për dëme dhe nuk është lëshuar asnjë paralajmërim për cunami, por autoritetet kanë këshilluar banorët të përgatiten për evakuim nëse është e nevojshme. "Është shumë e frikshme edhe të flesh gjumë," tha një banor për mediat lokale. "Duket sikur toka dridhet gjithmonë." Zona e Tokarës ka përjetuar grupe tërmetesh në të kaluarën, por frekuenca e dridhjeve më të fundit ka qenë e pazakontë, sipas mediave lokale. Japonia është një nga vendet me aktivitet sizmik më të lartë në Tokë, për shkak të vendndodhjes së saj në të ashtuquajturën Unaza e Zjarrit të Paqësorit, ku takohen shumë pllaka tektonike. Ajo përjeton rreth 1,500 tërmete çdo vit. Kjo seri dridhjesh vjen ndërsa i gjithë vendi është në ankth nga thashethemet se një tërmet masiv dhe vdekjeprurës mund të godasë së shpejti.