Data 9 maj shënon ditën e Europës ose ditën kur u hodh hapi i parë për krijimin e Bashkimit Europian. Kjo ditë është pritur me urime nga figurat kryesore të politikës shqiptare. Në urimin e tij kreu i Shtetit, Ilir Meta, ka rikujtuar aspiratën e studentëve të dhjetorit të vitit 90 dhe thirrjet e tyre “E duam Shqipërinë si gjithë Europa” duke bërë përgjegjës përfaqësuesit politikë për largimin e të rinjve. “Në të gjithë këto vite tranzicioni kemi patur mundësi të jashtëzakonshme jo vetëm për ta realizuar aspiratën e Studentëve të Dhjetorit '90 "E duam Shqipërinë, si gjithë Europa", por për ta bërë Shqipërinë, si gjithë Europa. Kjo do të ndodhë kur të gjithë përfaqësuesit e partive politike të mendojnë dhe të veprojnë për t'i dhënë forcë zërit të rinisë, duke iu garantuar mundësi dhe shanse të barabarta për të ndërtuar të ardhmen e sigurt europiane në Atdheun e tyre, për të ndalur njëherë e përgjithmonë atë që me të drejtë Papa Françesku e ka cilësuar si "dimri demografik", dramën më të madhe të vendit.” Në ditën e Evropës, Kryetari i Kuvendit, Gramoz Ruçi, solli në fokus asimetrinë e shkallës së demokracisë, e cila sipas tij po ngushtohet ndjeshëm midis Bashkimit Europian dhe Ballkanit Perëndimor. Sot, në Ditën e Europës, ne, shqiptarët, kemi shumë arsye të gëzojmë. Jo vetëm për rrënjët tona europiane, por edhe për aspiratat tona europaiste. Me kontributin, sakrificat dhe arritjet tona dhe të popujve të tjerë të Ballkanit Perëndimor ne po zgjerojmë projektin europian dhe po afrojmë kufijtë politikë të Europës në kufijtë kulturorë të saj. Ndërkohë kryeministri Edi Rama, ka postuar një video mesazh ku pasqyrohet qartësisht bashkëpunimi dhe mbështetja midis vendeve të Bashkimit Europian. Dita e Evropës përkon me ditën kur Robert Schumman, ministri i jashtëm i Francës lexoi për shtypin ndërkombëtar një deklaratë ku i bënte thirrje Francës, Gjermanisë dhe vendeve të tjera evropiane për të bashkuar prodhimet e tyre të qymyrit dhe çelikut që do të ishte “themeli i parë konkret për një Federatë të ardhshme Evropiane”. Kjo deklaratë hodhi bazat e krijimi të Bashkimit Europian.