73 vite më parë 12 shtete themeluan në Ëashington, aleancën më të madhe politiko-ushtarake, NATO-n, e cila ndër vite ka luajtuar një rol kyç në garantimin e sigurisë për 30 vendet anëtare, mes të cilave edhe vendi ynë. Ky përvjetor i gjen vendet e NATO-s përballë një klime kërcënuese për sigurinë, teksa agresioni rus po agravon në territorin ukrainas, duke bërë që të gjitha shtetet e botës të ndjejnë një tension të madh ekonomik dhe gjeopolitik. Ministrja për Evropën dhe Punët e Jashtme, Olta Xhaçka në 73 vjetorin e krijimit të NATO-s, vlerësoi partneritetin e Shqipërisë dhe vendeve të alenacës në misionet paqeruajtëse, ku janë bashkuar trupat ushtarakë shqiptarë. Sot, njësoj si 73 vjet me parë, është sërish NATO që garanton sigurinë kolektive të hapësirës Euro-Atlantike dhe të botës demokratike. NATO është sot më relevante se kurrë, anëtarët e saj më të bashkuar se kurrë përballë sfidave e kërcënimeve të sigurisë, si ato që vijnë nga agresioni i paligjshëm rus në Ukrainë.