34 mijë hektarë tokë u shkrumbuan në Shqipëri gjatë vitit 2025, që rezulton të jetë ndër vitet më të vështira sa i takon përhapjes së flakëve të zjarrit. Në 2025-ën u dogj gati dyfishi i sipërfaqes së djegur gjatë periudhës 2021-2024. Sipas raportit të Autoritetit Kombëtar të Mjedisit, nga totali i sipërfaqes të pushtuar nga zjarri, 16 mijë hektarë i takonin fondit pyjor dhe kullosor, ku u përllogarit një dëm që kapi shifrën e 77 milionë eurove. Zjarret u shtrinë në 47 bashki të vendit, por dëmet më të mëdha u regjistruan në jug të vendit. Të dhënat rendisin Delvinën si më të prekurën nga flakët masive të zjarrit, ndjekur nga Finiqi, Tepelena, Konispoli, Himara, Gramshi dhe Berati. Shkak u bënë jo vetëm temperaturat shumë të larta, thatësira e zgjatur dhe erërat e forta që krijuan terrenin për përhapjen e shpejtë të flakëve të zjarrit, por aktiviteti njerëzor pati një rol kyç. Djegia e mbetjeve bujqësore pa marrë masat e nevojshme të sigurisë, zjarret e ndezura për hapjen e kullotave të reja, hedhja e cigareve të ndezura në natyrë treguan një mungesë të përgjithshme të ndërgjegjësimit qytetar që solli dëme të mëdha dhe beteja të vështira me flakët e zjarrit. Nuk munguan edhe rastet e zjarrvënieve të qëllimshme, të lidhura shpesh me konflikte pronësie apo pastrim të paligjshëm të tokës.