Këto janë pamjet dramatike pranë Apolonisë së Fieruit, ku flakët kanë marrë përmasa të mëdha, duke u kthyer tashmë në një rrezik për banorët. Flakët kanë prekur edhe një pjesë të territorit të parkut arkeologjik, në pjesën lindore të tij, teksa momentalisht ështëe parandlauar përhapja në zonën e monumenteve. Ndërkohë, situata mbetet kritike jashtë territorit të parkut. Të favorizuara nga era e fortë, flakët po përhapen me shpejtësi, duke djegur qindra rrënjë ullinj dhe sipërfaqe të konsiderueshme me bimësi. Zjarri po avancon në drejtim të fshatit Kryegjatë, ndërsa flakët po përhapen në një sipërfaqe gjithnjë e më të madhe dhe po rrezikojnë banesa e prona. Në përpjekje për të mbrojtur pasuritë e tyre, banorët e zonës janë përfshirë drejtpërdrejt në luftën me flakët, duke tentuar të ndalojnë përhapjen e zjarrit drejt banesave dhe tokave bujqësore. Forcat zjarrfikëse vijojnë ndërhyrjen për të vënë nën kontroll vatrat e zjarrit dhe po ashtu ka nisur ndërhyrja nga ajri.