Një tjetër objekt i ndërtuar pa leje është sekuestruar në Ksamil. Bëhet fjalë për “Central Park Premium Hotel”, një godinë 5-katëshe, si edhe një objekt 1-katësh në funksion të aktivitetit hotelier. Për pronarin e tyre, Kujtim Peposhi, Gjykata e Sarandës ka caktuar masën e sigurisë “Arrest në shtëpi”, për veprën penale “Ndërtimi i paligjshëm”. Sekuestrimi i “Central Park Premium Hotel” dhe i objektit 1-katësh është kryer në lagjen nr. 2, në rrugën “Derolli” në Ksamil, në vijim të hetimeve të Prokurorisë së Sarandës për ndërtime pa leje, të kryera me qëllim përfitimi nga shërbimet hotelierike. Vendimi i Gjykatës së Sarandës është ekzekutuar nga Komisariati i Policisë Sarandë, në bashkëpunim me Prokurorinë dhe Agjencinë e Administrimit të Pasurive të Sekuestruara. Gjatë procedurave për zbatimin e vendimit, autoritetet kanë konstatuar se hoteli ishte ende në funksion dhe brenda tij ishin të akomoduar pushues. Për këtë arsye, janë marrë masa paraprake për administrimin e objektit, ndërsa më 6 tetor do të kryhen të gjitha veprimet e nevojshme për ekzekutimin e plotë të vendimit të Gjykatës. Në fokus të hetimit është ndërtimi i dy objekteve pa leje dhe përdorimi i tyre për aktivitet hotelier me qëllim përfitimi. Hetimet vijojnë për dokumentimin e plotë të rrethanave të rastit.