Të paktën 11 persona kanë humbur jetën dhe 10 zyrtarë të hekurudhës janë arrestuar pasi një tren pasagjerësh doli nga shinat në veri të Kajros në egjipt. Afro 100 persona u plagosën në incidentin e regjistruar të dielën pasi katër vagonë të tij dolën nga shinat në qytetin Banha, sapo kalon Kajron. Ministria egjiptiane e shëndetësisë tha në një deklaratë se përvec viktimave, të paktën 98 persona të tjerë ishin lënduar dhe pjesa më e madhe e tyre kishin kocka të thyera, prerje dhe djegie. Imazhet dhe videot e postuara në mediat sociale, tregonin vagonët e përmbysur dhe pasagjerët që përpiqeshin të largoheshin. Ekipet e shpëtimit shiheshin të kërkonin të mbijetuar nën vagonë. Nuk është ende e qartë se cfarë e bëri trenin të dilte nga shinat, por mediat vendase raportuan se të paktën 10 zyrtarë të hekurudhës, përfshirë drejtuesin e trenit dhe ndihmësin e tij, ishin arrestuar në pritje të përfundimit të hetimit. Ky është më i fundit në një zinxhir aksidentesh hekurudhore në egjipt. Ai i të dielës vjen tre javë pasi dy trena pasagjerësh u përplasën në një provincë tjetër egjiptiane duke i marrë jetën 18 personave dhe duke lënduar 200 të tjerë, mes të cilëve, fëmijë.