Qeveria zvicerane po diskriminon burrat me rregullat e saj për përfitimet e pensioneve, kështu ka dalë në përfundim Gjykata Evropiane e të Drejtave të Njeriut (GJEDNJ).Ky vendim tani do t’i kushtojë qeverisë zvicerane miliona në pagesa të prapambetura dhe do ta detyrojë atë të rishkruajë ligjin e pensioneve. Aktualisht, grave, burrat e të cilave vdesin, u paguhet pension për pjesën tjetër të jetës së tyre, ndërsa burrat marrin pension vetëm nëse kanë fëmijë nën 18 vjeç. Vendimi u përqëndrua në rastin e Max Beeler, një zviceran, gruaja e të cilit vdiq në një aksident në fillim të viteve 1990. Në moshën 41 vjeçare, ai la punën e tij për t'u kujdesur për dy fëmijët e tyre të vegjël dhe u mbështet nga një pension i të ndjerës, raportuan mediat lokale. Por në vitin 2010 pagesat e pensioneve u ndërprenë pasi fëmija i tij më i vogël mbushi 18 vjeç. Ai e coi cështjen në gjykatë, por ankesa e tij u hodh poshtë, pasi gjykata në rajonin e tij tha se burrat e ve, me përgjegjësi për fëmijët, pritet të kthehen në vendet e punës kur fëmijët të rriten, por e njëjta gjë nuk vlen për gratë. Çështja përfundimisht u dërgua në GJEDNJ, ku Beeler argumentoi me sukses se ai ishte diskriminuar. Gjykata konstatoi se roli i grave në vendin e punës kishte ndryshuar, dhe kështu mospërputhja shkelte nenin 14 të Konventës Evropiane për të Drejtat e Njeriut në diskriminimin e burrave. Beeler tani do të marrë pensionin e tij dhe shumë të tjerë si ai do të mund të paraqiten për të kërkuar përfitime të papaguara. Vendimi pritet të rihapë një debat të gjatë në Zvicër rreth asaj se sa pushtet duhet të kenë gjyqtarët evropianë mbi ligjin e brendshëm të një shteti.