Autoritetet në ishullin italian të Siçilisë mbeteshin sot në gatishmëri të lartë pas shirave të rënda që përmbytën rrugët me ujë e baltë që prej të dieles. Zjarrfikës dhe forca të policisë ishin dislokuar për pastrimin e rrënojave dhe kërkimin e personave të humbur. Një burrë 67 vjeçar që ishte shpallur i humbur në Scordia, u shpëtua sot pasdite, ndërsa vashdojnë kërkimet për bashkëshorten e tij 54 vjeçare, ende të humbur. Në pamje shihen pikërisht përpjekjet e mjeteve zjarrfikëse në kërkimet për çiftin, ku më pas u gjet vetëm burri. Sot zona të tëra të Siçilisë ishin nën pushtetin e motit të keq e të ujit që kishte pushtuar rrugët. Shtëpi, biznese e magazina janë përmbytur ndërsa furia e ujit të përzierë me baltë, ka marrë përpara makinat nëpër rrugë. Për këtë arsye, autoritetet vendore kanë zgjedhur të shpallin alarmin e kuq nga moti i keq, ndërsa mjaft shkolla janë mbyllur.