Banorët e godinave ku familja Shkambi pretendon se është pronare, hedhin dritë mbi prapaskenat e një konflikti shumëvjeçar që sipas tyre ka kulmuar me vrasjen tragjike të gjyqtarit Astrit Kalaja. Ata tregojnë se janë vendosur në këto ndërtesa me një urdhër zyrtar nga Bashkia Shkodër, vite më parë, në ambiente që kanë qenë në pronësi të shtetit. Banorët theksojnë se prona nuk ka qenë asnjëherë private dhe se ka shërbyer si strehim social apo objekte publike. Sipas tyre, në vitin 2012 është shfaqur papritur familja Shkambi me pretendimin se është pronare e godinave, duke paraqitur një vendim që mban firmën e ish-kryebashkiakut të Shkodrës, Lorenc Luka. Banorët akuzojnë se kjo pronësi është marrë me dokumente të falsifikuara, pasi – sipas tyre – familja Shkambi nuk ka asnjë akt trashëgimie që e lidh me këto prona. Ata thonë se ndër vite janë përballur me kërcënime, presion dhe përpjekje për t'i nxjerrë jashtë, ndërsa sot deklarojnë hapur se do të marrin pjesë në varrimin e gjyqtarit Kalaja, si një akt nderimi për drejtësinë që ai përfaqësonte.