Vlora mbetet pa kryetar bashkie. Burime pranë Top Channel bëjnë me dije se Ermal Dredha ka paraqitur dorëheqjen mbrëmjen e së mërkurës, ndërsa pritet që ajo të formalizohet ditën e enjte. Deri më tani, nuk ka një reagim zyrtar nga vetë Dredha apo nga institucionet përkatëse. Arsyet që çuan në këtë vendim mbeten ende të paqarta, por dorëheqja vjen në një moment ku marrëdhëniet mes kryetarit të bashkisë dhe kryeministrit kanë qenë të tensionuara. Dredha mori drejtimin e Bashkisë së Vlorës në korrik të vitit 2023, pas largimit të paraardhësit të tij, Dritan Leli. Gjatë muajve të fundit ai ka qenë në qendër të kritikave nga Kryeministri Edi Rama, sidomos për mënyrën e administrimit të shërbimeve publike dhe problemeve me infrastrukturën në qytet. Kritika e fundit publike erdhi vetëm pak ditë më parë, gjatë një takimi të shefit të qeverisë për Operatorin Kombëtar të Ujit, ku Rama adresoi drejtpërdrejt pakënaqësi për menaxhimin e situatës në Vlorë. Ndërkohë, mbetet për t’u parë se kush do të marrë drejtimin e bashkisë.