Një 59 vjeçar nga fshati Progër i Devollit ka humbur jetën pak momente pasi doli nga një klinikë dentare ku kishte marë shërbimin. Sipas të dhënave të policië, 59 vjeçari Sh. B i cili ka qenë i shoqëruar edhe nga familjarët pasi ka dalë nga klinika nuk është ndjerë mirë gjë që ua ka shprehur. Pavarësisht se ata kanë kërkuar ndihmë mjekësore 59 vjeçari është marë në rrugë nga shërbimi i urgjencës dhe është transportuar për t’iu dhënë ndihmë mjekësore por ai ka gjetur vdekjen. Të kontaktuar nga Top Channel familjarët e viktimës thanë jashtë kamerave se vdekja e 59 vjeçarit ka ndodhur për shkaqe natyrore dhe se nuk kishin asnjë pretendim në lidhje me trajtimin dentar që kishte marë viktima. Dyshimet e deritanishme lidhen me një infarkt të mundshëm që ka shkaktuar vdekjen e 59 vjeçarit por nga ana tjetër rasti është duke u hetuar dhe priten rezultatet e ekspertizës mjeko-ligjore për të konkluduar mbi çështjen. Pas ngjarjes grupi hetimor ka shoqëruar dentistin 36 vjeçar B.L për ta pyetur në lidhje me rastin ndërsa ka sekuestruar edhe kartelën mjekësore ku pasqyrohen të gjitha mjekimet dhe procedura e kryer. Mësohet se dentisti B.L është proceduar në gjendje të lirë për neglizhencë në trajtim mjekësor.