Menjëherë pas vdekjes së këngëtarit të njohur grek Giorgos Mazonakis, kontrolle të shumta kanë nisur në Greqi në klinika dhe qendra private. Mbrëmjen e së hënës, në Selanik, autoritetet vendosën mbylljen e një klinike private, ku u zbulua se funksiononte ilegalisht një repart onkologjik dhe kryheshin kimioterapi pa licencën përkatëse. Kontrolli i Autoritetit Kombëtar të Transparencës tregoi se klinika kishte ngritur një repart të plotë onkologjik, me pajisje edhe për përgatitjen e barnave kimio-tera-peutike, megjithëse ky repart nuk përfshihej fare në licencën e saj. Sipas hetimit, aty punonte një pneumolog i specializuar në onkologjinë e mushkërive, por pa kontratë të shkruar me klinikën. Klinika kishte gjithashtu mungesë infermierësh dhe specialistësh dhe nuk kishte në funksion Njësinë e Kujdesit Intensiv, edhe pse kjo ishte e detyrueshme. Autoritetet zbuluan edhe raste pacientësh të shtruar me diagnoza që nuk lidheshin me kancerin, por që gjatë qëndrimit kishin marrë barna kimioterapie. Problemet në klinikë ishin konstatuar që në vitin 2025. Në fillim të vitit 2026 ishte rekomanduar mbyllja e saj, por ajo vazhdoi të funksiononte. Tashmë është vendosur heqja e licencës, ndërsa dosja i është dërguar edhe Prokurorisë. Pas rastit Mazonakis, autoritetet kanë zgjeruar kontrollet në të gjithë sektorin privat të shëndetësisë. Me sistemin e ri MedWatch, autoritetet kanë skanuar mijëra klinika, kabinete, qendra estetike dhe struktura të tjera private. Vetëm në fazën e parë, në Atikë, janë evidentuar 231 struktura të klasifikuara si “të kuqe”, pra me indikacione që kërkojnë kontroll të menjëhershëm, ndërsa 424 të tjera janë futur në kategorinë “e verdhë” dhe do të rikontrollohen. Çështja ka shkaktuar edhe përplasje politike, me partitë e opozitës që akuzojnë qeverinë se kontrollet në sektorin privat të shëndetësisë kanë qenë të pamjaftueshme dhe se probleme të njohura prej vitesh nuk janë trajtuar në kohë.