Nëntëmbëdhjetë vite më parë, më 20 shtator 2006, u themelua Universiteti Europian i Tiranës. Nisi me dy fakultete në shkencat humane, për t’u zgjeruar në pesë fakultete, dhjetëra programe e profile studimi, mijëra të diplomuar dhe qindra projekte ndërkombëtare. Viti i 20-të e gjen UET-in në ndërtim e sipër të kampusit të ri universitar. I shtrirë në një sipërfaqe prej 16 mijë metrash katrorë, kampusi do të ofrojë hapësirat dhe mundësitë e një edukimi bashkëkohor, të krahasueshëm me universitetet më të mira në botë. “Universiteti Europian i Tiranës është licensuar në vitin 2006 dhe ne futemi praktikisht në 20 vjetorin e themelimit të saj, duke shtuar në portofolin tonë edhe ndërtimin e një kampusi të ri dhe modern, siç është struktura e që po vizitojmë sot. Kampusi ka një sipërfaqe prej 16 mijë metrash katrorë. Do të jetë një strukturë moderne, e pajisur me gati 20 laboratorë për të gjithë disiplinat e programeve që universiteti ynë ofron, do të ketë mbi 35 auditorë, Aula Magna, do të ketë një palestër moderne, për të gjithë studentët që ndjekin studimet në disiplinat e sporteve. Do të jetë një kampus modern, i denjë për një universitet në shekullin XXI.” I projektuar nga studioja e njohur spanjolle, Bofill Taller de Arquitectura, Kampusi do të ketë rreth 20 laboratorë dedikuar fushës së mjekësisë, inxhinierisë së ndërtimit, arkitekturës, informatikës dhe arteve. Po ashtu, do të ketë sallë teatri, palestra dhe ambiente të përshtatshme për programet e sporteve. “Jemi në 60% të punimeve. Momentalisht është duke u ndërtuar palestra, sigurisht sipas çdo standardi dhe çdo kërkese që plotëson funksionet e kërkuara nga ju. Gjithashtu, jemi në pritje të ndërtimit të sallës së auditorit, e cila do të jetë në formën e një teatri, e një auditori të mirëfilltë, dhe gjithashtu dhe një bibliotekë me dy kate lartësi, dubleks, në mënyrë që të akomodojë gjithë studente që do të duan të studiojnë këtu.” Konceptuar me ambiente moderne, kampusi do të ofrojë hapësira të bollshme për qëllime mësimore por edhe mjedise rekreative për studentët dhe stafin e tij. I pozicionuar në një zonë në zhvillim, kampusi i Universitetit Europian të Tiranës, i cili mbyll fazën e ndërtimit të strukturës në fund të këtij viti, do të jetë referenca e re në kryeqytet.