Trupat e 28 emigrantëve kanë dalë në brigjet perëndimore të Libisë pas mbytjes së barkës së tyre në një prej kalimeve më vrasëse të emigracionit. "Grupet e Gjysmë-hënës së Kuqe libiane rekuperuan trupat e 28 emigrantëve të vdekur dhe gjetën 3 të mbijetuar në vendndodhje të ndryshme të plazhit të Al-Alus" thanë burimet. "Trupat ishin në gjendje të avancuar dekompozimi që do të thotë se katastrofa ka ndodhur disa ditë më parë”, tha përfaqësuesi, duke shtuar se numri i viktimave mund të rritet ende. Imazhet e publikuara nga mediat libiane tregonin trupat e reshtuar në plazhin rreth 90 km larg kryeqytetit Tripoli. Libia është shkatërruar nga më shumë se një dekadë konflikt e paligjshmëri që prej përmbysjes së pushtetit të diktatorit Muamar Gadafi në 2011. Tashmë vendi është kthyer në një pikë kryesore të nisjes së emigrantëve afrikanë e aziatikë drejt Evropës, të cilët shfrytëzohen nga bandat e dhunshme të trafikut. Tragjedia e fundit vjen pasi160 emigrantë vdiqën brenda një jave në incidente të ngjashme. Numri total i të humburve për këtë vit është të paktën 1500, sipas Organizatës Ndërkombëtare të Emigracionit.