Zëvendëspresidenti i Shteteve të Bashkuara të Amerikës, JD Vance, ka thënë se forca ushtarake nuk është e nevojshme për ta marrë kontrollin e Groenlandës, pasi sipas tij, groenlandezët do duan me dëshirë t’i bashkohen SHBA-së. Gjatë vizitës së zëvendësit të tij në bazën ushtarake amerikane në ishull, reagoi sërish presidenti amerikan, Donald Trump duke thënë se “amerika duhet ta ketë Groenalndën, sepse është e rëndësishme për paqen në botë dhe kjo nuk ka të bëjë vetëm me paqen në SHBA”. Pak para se të largohej nga ishulli, Vance tha se “Groenlanda është jashtëzakonisht e cenueshme tani". “Groenlandezët do të dëshirojnë të bashkëpunojnë me SHBA-në”, është shprehur ai, pavarësisht nga sondazhet që tregojnë kundërshtim të gjerë nga popullsia vendase ndaj qeverisjes nga SHBA-ja. Ai ka fajësuar sërish Danimarkën, duke thënë se nuk e kanë mbajtur zonën të sigurt. Vance, zyrtari më i lartë amerikan që ka vizituar ndonjëherë ishullin – u shpreh se baza e SHBA-së në Groenlandë është jetike për monitorimin e kërcënimeve raketore ndaj Amerikës së Veriut dhe do të luajë rol në të ardhmen. Vance paralajmëroi se Kina dhe Rusia po tregojnë interes më të madh për Arktikun sesa aleatët e SHBA-së në Evropë. “Ne e dimë se kinezët janë shumë, shumë të interesuar për këtë ishull. Gjithashtu edhe Rusia. Kemi prova të forta”, ka thënë Vance. Pas disa orësh qëndrimi në Groenlandë, Vance i shoqëruar nga gruaja u kthye në Amerikë.