Presidenti i Shteteve të Bashkuara të Amerikës, Donald Trump, ka thënë se marrëveshja mes SHBA-së dhe Iranit është “plotësisht e nënshkruar dhe Ngushtica e Hormuzit është plotësisht e hapur”, raporton "BBC". Trumpi i bëri këto komente gjatë takimit me presidentin e Francës, Emmanuel Macron, në Francë. “Jam shumë i lumtur të them se është nënshkruar, marrëveshja është plotësisht e nënshkruar”, tha Trump. Deklaratat e presidentit amerikan erdhën pasi zyrtarë të lartë të administratës thanë se memorandumi i mirëkuptimit u nënshkrua në mënyrë elektronike nga Trump, zëvendëspresidenti i SHBA-së, JD Vance dhe kryetari i Parlamentit të Iranit, Mohammad Ghalibaf. Duke folur në fillim të bisedimeve dypalëshe me presidentin francez, Emmanuel Macron, të hënën, Trump hodhi poshtë një mision të përbashkët detar të propozuar nga Britania e Madhe dhe Franca në Ngushticën e Hormuzit, duke thënë “Nuk mendoj se do të na duhet shumë ndihmë” për ta mbajtur atë të hapur. “Mendoj se shumë gjëra të shkëlqyera do të ndodhin në Lindjen e Mesme tani. Dhe shumë e rëndësishme, nafta po bie ndjeshëm dhe tregu i aksioneve po ngrihet si një raketë sot. Gjëja kryesore është se Irani nuk do të ketë një armë bërthamore”, tha Trump Ceremonia zyrtare e nënshkrimit do të mbahet të premten në Gjenevë.