Përplasjet mes dy kandidatëve për president në SHBA, demokrates Kamala Harris dhe republikanit Donald Trump kanë nisur që përpara përballjes së tyre të parë qëplanifikohet të mbahet në 10 shtator, me palët që nuk pajtohen mbi kushtet e saj. Kur dy ekipet elektorale patën rënë dakord për debatin televiziv kombëtar prej 90-minutash në kanalin ABC Neës në qytetin lindor Filadelfia, ishte me të njëjtat kushte sipas të cilave ish-Presidenti Trump debatoi me shefin e Shtëpisë së Bardhë, Joe Biden në fund të qershorit, me mikrofonat e mbyllur gjatë kohës kur fliste kandidati tjetër. Por Harris kërkon tani që mikrofonët të lihen ndezur përgjatë të gjithë debatit. Mediat në SHBA thonë se kjo është një lëvizje që mund të çojë në shkëmbime më të gjalla dhe të drejtpërdrejta midis dy kandidatëve – ose në aq shumë shkëmbime sa që miliona shikues që priten ta ndjekin mund të kenë vështirësi të dëgjojnë pikëpamjet konkurruese të kandidatëve. Sipas ekipit të Harris, "ndihmësat e Trump-it i duan mikrofonët të mbyllur sepse mendojnë që ai mund të shpërthejë në komente dhe të mos përmbahet dot gjatë 90 minutave debat. Trumpi vetë u shpreh se kjo nuk do të përbënte një ndryshim të madh për të, edhe pse kujtoi se normalisht, marrëveshja ishte për një situatë njësoj si ajo e kaluara kur mikrofonët ishin të fikur. "E vërteta është se ata po përpiqen të dalin nga marrëveshja”, u shpreh ai. Debati i 27 qershorit, mes ish-Presidentit Trump dhe Presidentit Biden luajti një rol kyç në fushatën presidenciale të këtij viti. Paraqitja e dobët e Bidenit 81-vjeçarit ngjalli panik mës demokratëve, që i kërkuan tërheqjen nga përpjekja për rizgjidhje, duke i hapur kështu zëvendëses së tij rrugën drejt garës presidenciale.