Një ditë pas vrasjes me thikë të 14 vjeçarit në fshatin Pirg, një tjetër ngjarje e rëndë ka ndodhur në juglindje të vendit. Një 27 vjeçar është plagosur me thikë në fshatin Dvoran nga bashkëfshatari i tij pas një konflikti të çastit. Sipas të dhënave të policisë, 27 vjeçari Ari Kodra emigrant, i cili ishte kthyer në vendlindje me familjen për pushime, është goditur me thikë nga Aleks Qiqi, një person me precedentë të mëparshëm kriminalë. Ngjarja ka ndodhur në rrugë, ku mësohet se autori dhe i plagosuri ishin në një tavolinë së bashku me disa persona të tjerë, ndërsa kanë nisur duke u "ngacmuar" me fjalë me njëri tjetrin. Autori ka shkuar në banesë, ka marrë thikën dhe është kthyer duke e plagosur, ndërsa personat e tjerë që kanë qenë në tavolinë kanë ndërhyrë, duke goditur fizikisht pas plagosjes autorin. Banorët pohojnë se 27 vjeçari, i cili mbeti i plagosur, nuk është një person konfliktual ndryshe nga autori i cili njihet si person problematik.