Pronari i restorantit “Le Constellation” në Krans-Montana, Jacques Moretti (Zhak Moreti), është arrestuar dhe është dërguar në burgun e Sionit, pas vendimit të marrë nga prokuroria zvicerane. Bëhet fjalë për lokalin ku ndodhi tragjedia e Vitit të Ri, nga e cila humbën jetën 40 persona. Vendimi për arrestimin e 49-vjeçarit u mor nga prokurorja, pas rreth shtatë orësh marrjesh në pyetje. Ndërkohë, bashkëshortja e tij, Xhesika Moreti, është lënë në masë sigurie dhe, sipas mediave zvicerane, do të detyrohet të mbajë byzylyk elektronik si dhe të paraqitet në polici çdo tre ditë. Çifti ishte paraqitur së bashku në ndërtesën e prokurorisë së Sionit herët në mëngjes, në heshtje dhe nën vëmendjen e dhjetëra fotografëve. Ata dolën veçmas. Jessica Moretti, e shoqëruar nga avokatët e saj, u ndal për disa çaste për të folur me media, mes lotësh. “Mendimet e mia janë me viktimat dhe me ata që sot po luftojnë për jetën. Është një tragjedi e paimagjinueshme dhe dua të kërkoj ndjesë”, tha ajo. Zhak Moreti u largua nga një hyrje dytësore, i shoqëruar nga oficerë të policisë gjyqësore. Sipas burimeve hetimore, faktori kryesor që ndikoi në këtë vendim. I pari lidhet me shtetësinë franceze të Morettit dhe bashkëshortes së tij. Prokuroria vlerëson se një rikthim i mundshëm në Francë do ta bënte pothuajse të pamundur zhvillimin e një procesi gjyqësor në Zvicër, pasi autoritetet franceze rrallë pranojnë ekstradimin e qytetarëve të tyre. Ata akuzohen për disa krime, një mes të cilëve edhe “vrasje nga pakujdesia”.