Një anëtar i një bande shqiptare që kalon kontrabandë emigrantë drejt Britanisë së Madhe rrëfeu për mediat atje se Londra zyrtare mund t`i ndalojë që nesër kalimet e paligjshme, por sipas tij, nuk do vetë që ta bëjë një gjë të tillë. Trafikanti, i cili pranoi të fliste vetëm nëse nuk zbulohej identiteti i tij, pohoi për Daily Express bindjen e vet se Partia Laburiste nuk i ndalon gomonet që kalojnë La Manshin, sepse mbërritjet e këtyre njerëzve forcojnë fuqinë punëtore në Angli. "Nuk besoj se Mbretërisë së Bashkuar i mungojnë mjetet për të ndaluar që kjo gjë të ndodhë”, tha shqiptari për Daily Express. Ai pretendon se do të ishte e lehtë që varkave e gomoneve t`u ndalohej largimi që në Francë, pasi sipas tij, në të gjithë vijën bregdetare franceze ka vetëm dy apo tre pika nisjeje, dhe mjetet lundruese ndjekin që të gjitha rrugë të njohura dhe të gjurmueshme. Trafikanti rrëfeu kishte fituar rreth 400,000 paund nga qindra njerëz të dëshpëruar duke i dërguar ata me gomone në këtë vend, përpara se të hiqte dorë nga ky aktivitet i rrezikshëm në fillim të këtij viti. Kontrabandisti i njerëzve i quajti nga ana tjetër “qesharake” protestat kundër emigrantëve përpara hoteleve britanike që strehojnë azilkërkues. “Shumica e atyre pasagjerëve janë thjesht 'të pashpresë', të gatshëm të rrezikojnë jetën në kërkim të një të ardhmjeje më të mirë. Nuk mendoj se një grua me një fëmijë të vogël mund të konsiderohet kriminele', shprehet ai, duke shtuar se nuk janë emigrantët problem kryesor i Britanisë së Madhe sot. Rreth 50,000 gomone kanë mbërritur në Mbretërinë e Bashkuar që kur Partia Laburiste mori frerët e pushtetit korrikun e vitit të kaluar. Ministria e Brendshme britanike njoftoi këtë muaj masa të ashpra kundër promovimeve në mediat sociale të kalimeve të paligjshme nga Franca në Angli.