Policia ka vënë në pranga dy shtetas dhe ka shpallur në kërkim një tjetër, të dyshuar si pjesëtarë të një grupi kriminal që merrej me trafikimin e armëve të zjarrit. Të arrestuarit janë Jurgen Suca, 26 vjeç, dhe Segest Meti, 20 vjeç, ndërsa një 20-vjeçar tjetër, banues po ashtu në Shkodër, është shpallur në kërkim. Sipas hetimeve paraprake, këta persona kishin fshehur një armë zjarri të pajisur me silenciator – të ndarë në pjesë, brenda një televizori, me qëllim trafikimin e saj drejt Mbretërisë së Bashkuar. Televizori ishte vendosur në një kamion mallrash, i cili u ndalua për kontroll nga policia në zonën e “Bulevardit të Ri” në Tiranë. Shoferi i mjetit, sipas deklarimeve, nuk kishte dijeni për ngarkesën e paligjshme. Hetimet janë në vijim për identifikimin dhe arrestimin e personave të tjerë të përfshirë në këtë rrjet të trafikut të armëve. Ndërkohë, njëri nga të ndaluarit, Segest Meti, rezulton të jetë dënuar më herët në Angli me 3 vite e 2 muaj burg për një ngjarje të ndodhur më 13 janar 2024 në Basingstoke, ku akuzohej për plagosje me thikë.