Autoritetet e Kosovës zhvilluan këtë të mërkurë një tjetër aksion në Veri, duke mbyllur një sërë institucionesh serbe. Autoritetet njoftua se kanë mbyllur zyrat e Fondit të Pensioneve dhe Invaliditetit, Shërbimin Kombëtar të Punësimit dhe Fondin Republikan për Sigurime Shëndetësore në Leposaviç, si dhe Ndërmarrjen Publike Komunale në Shtërpcë, komunë me shumicë serbe në jug të Kosovës. Të gjitha këto institucione funksiononin sipas sistemit të Serbisë, të cilin Kosova e konsideron të paligjshëm dhe paralel. Ministri i Brendshëm i Kosovës, Xhelal Sveçla, tha se nuk do të lejohet asnjë institucion paralel i Serbisë. “Asnjë institucion paralel i Serbisë nuk ka vend në Republikën e Kosovës. Asnjë paralelizëm i institucioneve tona e nën direktivat e Beogradit brenda territorit të vendit tonë nuk do të funksionojë në asnjë formë”. Nga ana e saj, Serbia e cilësoi vendimin si përndjekje dhe iu kërkoi autoriteteve ndërkombëtare të reagonin. “E gjithë kjo po ndodh në praninë e bashkësisë ndërkombëtare, e cila në heshtje po vëzhgon terrorin ndaj serbëve dhe përndjekjen e mëtejshme të popullit tonë”, thuhet në deklaratën e Serbisë. Deri më tani janë mbyllur organet e përkohshme komunale, qendrat për punë sociale, Posta e Serbisë, Banka Postare Kursimore dhe ndërmarrjet publike.