Presidenti rus, Vladimir Putin, tha të enjten se është dakord në parim me propozimin amerikan për një armëpushim 30-ditor në Ukrainë, por shtoi se kushtet e tij duhet të përpunohen dhe se një pauzë e tillë duhet të hapë rrugën drejt paqes së qëndrueshme. "Ne sigurisht e mbështesim atë, por ka çështje që duhet t'i diskutojmë dhe mendoj se duhet ta diskutojmë atë me kolegët dhe partnerët tanë amerikanë", tha Presidenti Putin në një konferencë shtypi në Moskë. Presidenti rus tha se armëpushimi duhet të eliminojë shkaqet bazë që çuan në fillimin e konfliktit dhe se mbeten ende shumë detaje për t’u zgjidhur. I menjëhershëm ishte reagimi i Presidentit të Shteteve të Bashkuara, Donald Trump. "Shpresojmë se ata do të bëjnë gjënë e duhur", u tha Presidenti Trump gazetarëve gjatë një takimi në Zyrën Ovale me Sekretarin e Përgjithshëm të NATO-s, Mark Rutte. Presidenti Trump tha se nuk mendon se Rusia do të sulmojë aleatët e Shteteve të Bashkuara. "Kjo nuk do të ndodhë. Ne do të sigurohemi që kjo të mos ndodhë", tha ai. Presidenti amerikan Donald Trump tha gjithashtu se i dërguari i tij i posaçëm amerikan, Steve Ëitkoff, po zhvillon bisedime serioze me Rusinë lidhur me përfundimin e luftës në Ukrainë.