Në ditët e fundit të verës, me ikjen e gushtit duket se po largohet edhe nxehtësia përvëluese duke i lënë vendin një stuhie të fuqishme. Që prej mesditës të kësaj të shtune vendi u përfshi në një situatë të vështirë atmosferike. Tirana u paralizua nga reshjet e dendura të shiut. Në kryeqytet vec intesitetit të lartë të reshjeve, pati edhe erë të fortë, ku pamjet tregojnë edhe rroba që fluturojnë apo pemët që lëkunden fort duke bllokuar edhe rrugët. Në lagje të ndryshme të Tiranës pati edhe përmbytje. Ndryshimi i temperaturave u parashikua dhe nga shërbimi meteorologjik ushtarak, që vlerëson se këto kushte të motit do të vijojnë deri më 2 shtator. Edhe sinoptikani I njohur grek Sakis Arnaoutoglou paralajmëroi kthesën e papritur të motit në Shqipëri, me stuhi të forta me vetëtima dhe breshër në sasi të madhe, me kohëzgjatje deri mesditën e të dielës. Në këto kushte, edhe kryetarja e komanduar e bashkisë së Tiranës këshillon banorët të marrin masa për sigurinë e tyre duke kërkuar shmangien e lëvizjeve të panevojshme. Ndërsa njoftoi se strukturat e Bashkisë së Tiranës dhe Emergjencat Civile janë në gatishmëri të shtuar për menaxhimin e situatës.