Pas katër ditësh përshkallëzim të protestave në Tiranë e mbarë vendin, Elisa Spiropali është zëri i parë ndryshe brenda mazhorancës socialiste. Në një letër drejtuar Edi Ramës, deputetja socialiste i kërkon kryeministrit të japë zgjidhje për situatën kaotike që ka përfshirë kryeqytetin, me dhunë e përleshje. “Jep zgjidhje politike. Pa tabu, pa kufij dhe pa frikë. Dil përballë qytetarëve. Mos u fshih pas shumicës, institucioneve, apo numrit të mandateve. Prano se besimi nuk rikthehet me fjalë, por me përgjegjësi dhe veprime. 82 mandatet nuk janë mandat për të mos dhënë llogari. Janë përgjegjësi për të qeverisur edhe për ata që nuk na kanë votuar”. Për ish-shefen e diplomacisë shqiptare, protesta nuk kërkon vetëm përgjigje policore në fushëbetejë, por duhet një tryezë e gjerë dialogu me të gjitha palët.