Avokati i Hashim Thaçit, Luka Misetic, ka ngritur disa pikëpyetje lidhur me një deklaratë të presidentit serb, Aleksandar Vuçic për takimin e tij me presidentin francez, Emmanuel Macron më mesin e shtatorit në Paris. Avokati bëri me dije se Vucic ka deklaruar në një video se gjatë takimit me një “lider europian dhe botëror”, ky i fundit i kishte treguar se Thaçi do të merrte “një denim shumë të rëndë”. Misetic mendon se ky lider është Macron. Si është e mundur, pyet juristi, që shefi i Elizesë të kishte dijeni për vendimin e Gjykatës Speciale disa ditë përpara shpalljes së tij dhe përse do të ishte diskutuar kjo cështje mes presidentit francez dhe atij serb. “Vucic u takua me Macron në 10 shtator në Paris, dhe ai e pohoi vetë në video që ishte informuar për dënimin e Thacit gati një javë përpara se ai të merrej nga gjykata. Në këtë situatë, janë disa pyetje që kërkojnë përgjigje”, ka shkruar Misetic. Komentet e tij vijnë në kohën kur në Kosova vazhdpojnë protestat kundër aktgjykimit që dënoi gjithsej me 81 vite burgim Thacin, dhe ish krerët e tjerë të UCK-së, Kadri Veseli, Jakup Krasniqi e Rexhep Selimi me argumentin se kanë kryer krime lufte. Presidentja e Komisionit Europian, Ursula von der Leyen, deklaroi të enjtën në Prishtinë se pavarësia e gjykatës në Hagë duhet të garantohet dhe aktgjykimi dënues ndaj ish-krerëve të Ushtrisë Çlirimtare të Kosovës duhet të respektohet plotësisht, duke ngulur këmbë në të njëjtën kohë se “askush dhe asgjë” nuk mund ta rishkruajë historinë e Kosovës.