Të paktën 213 persona kanë humbur jetën nga përmbytjet në Spanjë, ndërsa numri i tyre pritet të rritet edhe më shumë me kalimin e orëve, pasi shpresat për gjetjen e të mbijetuarve shuhen. Sot, Mbreti Felipe, Mbretëresha Letizia dhe kryeministri Pedro Sanchez pritet të vizitojnë Spanjën juglindore, e cila është goditur nga fatkeqësia më e keqe natyrore në historinë e fundit të vendit, sipas autoriteteve. Të shtunën, Sanchez njoftoi vendosjen e një shtesë prej 5,000 trupash për të ndihmuar në kërkimin e personave të zhdukur, duke e çuar totalin në 7,500. Ky është “dislokimi më i madh i forcave të armatosura që ka ndodhur ndonjëherë në Spanjë në kohë paqeje”, sipas Sanchez. 5000 policë dhe xhandarë të tjerë shkuan për të mbështetur kolegët e tyre. Përforcimet priten me padurim në disa komunitete ku edhe disa ditë pas tragjedisë situata ende cilësohet si kaotike. Ndërkohë, mijëra banorë nga gjithë Spanja kanë udhëtuar drejt Valncias, për t’ju ardhur në ndihmë banorëve. Sipas Shërbimit Meteorologjik Spanjoll reshjet në vende ishin të barabarta me ato të regjistruara “në një vit” brenda pak orësh.