Katër persona u arrestuan nga autoritetet gjermane pasi dyshohet se do të merrnin pjesë në një sulm terrorist. Të ndaluarit sipas policisë janë pjesë e organizatës së Hamas dhe po mendonin të sulmonin zonat ku banojnë hebrenjtë. Tre prej arrestimeve sipas autoriteteve gjermane u bënë në Berlin dhe një tjetër në Holandë. Ndërsa në pranga përfunduan shtetas libanezë dhe egjiptian. Ndalime pati dhe në Danimarkë, ku policia njoftoi se prangosi tre persona me po të njëjtën akuzë. Ende nuk është e qartë nëse grupet bashkëpunonin me njëri-tjetrin ,raporton BBC. Kryeministrja daneze e cilësoi kërcënimin tejet serioz. Ministri danez i Drejtësisë tha se komploti i supozuar "konfirmon në mënyrë tragjike se hebrenjtë danezë janë nën kërcënim". Ndërkohë zyra e kryeministrit izraelit Benjamin Netanyahu tha në një deklaratë në X (ish-Twitter) se shtatë personat e arrestuar "po vepronin në emër të Hamasit". Në fillim të këtij muaji, komisionerja e BE-së për Çështjet e Brendshme, Ylva Johansson paralajmëroi se Evropa po përballet me një "rrezik të madh" sulmesh terroriste që mund të ndodhin gjatë periudhës së Krishtlindjeve. Pamjet: AFP