Qeveria ka miratuar një fond prej katërmbëdhjetë milionë e shtatëqind mijë lekësh të reja si shpërblim për sportistët fitues të medaljeve olimpike si dhe të trajnerëve të tyre, pjesëmarrës në Lojërat Olimpike “Paris 2024”. Në Fletoren Zyrtare është publikuar vendimi i firmosur me 12 gusht nga kryeministri Edi Rama, ku theksohet se “programit buxhetor për zhvillimin e sportit’, i shtohet fondi prej 14 milionë e 700 mijë lekësh për shpërblimin e sportistëve fitues të medaljeve olimpike. Dy mundësit Islam Dudaev dhe Chermen Veliev shkruan historinë e sportit shqiptar, duke fituar për herë të parë dy medalje bronzi në Lojërat Olimpike. Sipas parashikimeve të ligjit, sportistët me medalje bronzi shpërblehen me 5 milionë lekë të reja dhe do të marrin dhe gradën kolonel në Ushtrinë Shqiptare. Fondet për shpërblimin e sportistëve dhe trajnerëve medalistë do të përballohen nga fondi rezervë i buxhetit të shtetit.