Top Channel/ Shkolla të reja në Tiranë/ Kryebashkiaku: Edhe në zonat rurale me të njëjtën cilësi

Shkolla e re e fshatit Dritas, pjesë e buqetës së 40 shkollave të reja në Tiranë, po ngrihet më e bukur dhe më e fortë, gati të presë nxënësit në shtator. Kryebashkiaku Erion Veliaj vizitoi ecurinë e punimeve në këtë shkollë, për të cilën tha se do jetë me kushte edhe më të mira se shkollat në qendër të Tiranës. “Parimi është që edhe nxënësit e Zall-Herrit të kenë një shkollë me të njëjtën cilësi, standard dhe hapësira si çdo shkollë tjetër që po bëjmë në Tiranë. Shumë prej shkollave në ish Bllok nuk kanë as gjysmën e këtij standardi. Është fati i shkollave të reja, për të cilat me historinë e rindërtimit pas tërmetit, na është dhënë një mundësi e jashtëzakonshme t’i ndërtojmë si kudo në perëndim. Dita e parë e shkollës do të jetë një ditë e bekuar shtatori, kur fëmijët të hyjnë në këtë shkollë dhe do ndihen realisht qytetarë të Tiranës”, tha Veliaj.