Sekretari amerikan i Shtetit, Antony Blinken tha të mërkurën se Uashingtoni kishte parë "prova" se Rusia mund të planifikonte një pushtim në Ukrainë, duke kërcënuar Moskën me sanksione të forta ekonomike nëse sulmon. “Ne jemi thellësisht të shqetësuar nga provat se Rusia ka bërë plane për lëvizje agresive kundër Ukrainës, planet përfshijnë përpjekje për të destabilizuar Ukrainën nga brenda si dhe operacione ushtarake në shkallë të gjerë”, tha Blinken pas një takimi të ministrave të jashtëm të NATO-s në Riga. “Ne ia kemi bërë të qartë Kremlinit se do të përgjigjemi me vendosmëri, duke përfshirë një sërë masash ekonomike me ndikim të lartë, të cilat nuk i kemi përdorur në të kaluarën”.