Shtetet e Bashkuara të Amerikës kanë akuzuar Google se nuk ka vepruar sipas rregullave në përpjekjet e saj për të mbajtur dominancën në kërkimet online. Sipas Departamentit amerikan të Drejtësisë, kompania e teknologjisë pagoi 10 miliardë dollarë që rivalët më të vegjël të mos ishin kurrë tërheqës për përdoruesit. Në detajet e zbuluara thuhet se Google që nga viti 2010 nisi të ruante në mënyrë të paligjshme monopolin. Departamenti amerikan i Drejtësisë ka akuzuar kompaninë se çdo vit ka paguar miliarda dollarë për prodhuesit e pajisjeve sikurse Apple Inc dhe disa kompani të tjera të internetit, për t’i dhënë motorit të kërkimit të Google hapësirë në treg prej 90 për qind. Për më tepër, gjatë gjykimit u raportua se kompania e teknologjisë ka mashtruar në ankandet për reklamat e vendosura në internet, në mënyrë që të rrisë çmimet për reklamuesit. “Ky rast ka të bëjë me të ardhmen e internetit. Shkalla e mashtrimit ka rëndësi dhe Google në mënyrë të paligjshme ka mbajtur monopolin për më shumë se një dekadë”, raportuan organet e drejtësisë gjatë gjykimit që u mbajt në Washington. Ndër të tjera është theksuar se Google ka një konkurrencë serioze, por ka lënë pas dore problematikat e vërteta në lidhje me privatësinë, që shpesh ka ngjallur shqetësime. Në një gjykatë federale në Washington kanë nisur deklaratat për këtë rast, ndërsa seancat pritet të zgjasin të paktën dhjetë javë dhe do të ndahen në dy faza. Pamjet: AFP