Presidenti amerikan Joe Biden përgatitet të njoftojë se 500 milionë teste të shpejta falas do t`u shpërndahen amerikanëve në përpjekje për të luftuar përhapjen e variantit të ri të koronavirusit, Omicron. Shefi i Shtëpisë së Bardhë po kështu do të mobilizojë rreth 1.000 pjesëtare të personelit mjekësor ushtarak për të ndihmuar në spitalet e tejmbushura teksa vendi përballet me një valë të re infektimesh. Në Shtetet e Bashkuara, senatorët demokratë Elizabeth Warren dhe Cory Booker njoftuan se kishin rezultuar pozitiv në testin për Covid-19, duke theksuar se të dy tashmë kishin marrë dozën e tretë të vaksinës dhe ishin me simptoma të lehta. Vala e pestë e pandemisë së koronavirusit, e nxitur kryesisht nga varianti Omicron, vazhdon të përhapet në të gjithë botën, duke mbingarkuar sistemet e kujdesit shëndetësor. Omicroni konsiderohet tashmë përgjegjës për 73% të rasteve të reja të regjistruara javën që shkoi në Shtetet e Bashkuara. Në disa vende, masat e qeverisë për të frenuar përhapjen e Covid-19 kanë ndeshur në kundërshtimin e atyre që thonë se janë lodhur me bllokimet apo me masa të tjera, si vaksinimi i detyrueshëm. Që nga e premtja, Britania vendosi rekordin e tretë në po aq ditë me më shumë se 93,000 infeksione, ndërsa qyteti i Nju Jorkut raportoi numrin e më të lartë ditor të rasteve, me më shumë se 21,000 infeksione, duke e tejkaluar rekordin e mëparshëm të arritur në janar të këtij viti.