Kryeministri spanjoll Pedro Sanchez i dha fund pesë ditë spekulimesh mbi të ardhmen e tij me pohimin se nuk do ta japë dorëheqjen, pavarësisht hijeve të skandalit që rrethojnë bashkëshorten e tij. Javën që shkoi, Sanchez njoftoi se po anullonte të gjitha angazhimet zyrtare pas hapjes së nje hetimi mbi të shoqen për akuza korrupsioni. Sanchez i hodhi poshtë këto pretendime, edhe pse pohoi se po e shqyrtonte mundësinë e lënies së postit. Megjithatë, tani ka vendosur që të qëndrojë në detyrë. Nisja e hetimeve erdhi pas akuzave të bëra në një platformë ligjore të krahut të djathtë se bashkëshortja e Kryeministrit spanjoll, i cili është edhe president ii Internacionales Socialiste, e kishte shfrytëzuar pozitën e saj për të ndikuar tek disa marrëveshje biznesi. Sanchez deklaroi përmes një postimi në rrjetin social X, se akuzat ndaj bashkëshortes së tij, Begona Gomez, janë të rreme. “Begona do të mbrojë nderin e saj dhe do të bashkëpunojë me sistemin e drejtësisë në çdo formë që kërkohet për të sqaruar që këto fakte që duken skandaloze nuk ekzistojnë në fakt,” u shpreh ai. Zonja Gomez, 49 vjeçe, nuk ka mban ndonjë post publike dhe ruan një profil të ulët politik. 52 vjeçari, ka shërbyer si kryeministër i Spanjës që nga viti 2018. Ai arriti të formojë një qeveri të koalicionit të krahut të majtë në nëntor për të filluar edhe një mandat të ri katër vjeçar dhe është një nga udhëheqësit socialist që ka qëndruar më gjati në pushtet në Europë.