Paniku për sheqer ka mbërthyer dyqanet e Rusisë, thotë BBC. Sipas disa raportimeve, autoritetet janë duke vendosur kufizime per sasinë e ushqimit që mund të blihet nëpër dyqanet ruse. Kërkesa më e madhe ka qenë për sheqer. Në rajonin e largët lindor, Maritime, nuk lejohet të blihen më shumë se dy kilogramë sheqer, miell, oriz, kripe e disa ushqimeve tjera. Po ashtu është vënë kufizim në deri dy litra të blerjes së vajit dhe tre pako ushqimi për foshnja. Është vetë e përditëshmja Kommersant, që raporton një situatë të tillë. Në Kabarovsk, qytet i ndodhur në atë rajon, ka pasur panik të blerjes së sheqerit dhe ky produkt nuk shihet më në dyqane, shkruajne agjencitë lokale të lajmeve. Megjithatë, zëvendësministri i Industrisë dhe Tregtisë, Viktor Yevtukhov (Jevtukov), këmbënguli se “nuk ka probleme me sheqerin”, dhe se Rusia prodhon mjaftueshëm sasi për banorët e saj. Ai shpjegoi po kështu se me qëllimin të mos ketë mungesë në treg, Moska ka ndaluar dhe eksportin e sheqerit. Javën e kaluar, Shërbimi kombëtar i Statistikave, Rosstat njoftoi se çmimet e sheqerit janë rritur me gati 13 për qind. Sanksionet e vendosura ndaj Rusisë pas pushtimin të Ukrainës, kanë dobësuar valutën ruse, rublën, dhe kanë sjellë një rritje të inflacionit, e për rrjedhojë, edhe një rritje të cmimit të ushqimeve.