Dy avionë bombardues strategjikë rusë të tipit Tu-95MS kryen një fluturim prej 10-orësh mbi ujërat neutrale pranë Alaskës, njoftoi ministria ruse e mbrojtjes. Lëvizja e Moskës vjen vetëm një ditë pasi shefi i Kremlinit, Vladimir Putin u ankua për fluturimet ushtarake perëndimore afër hapësirës ajrore të Rusisë. Putin madje doli me pretendimin se bombardues strategjikë të perëndimit, të pajisur me armë të rrezikshme, kanë fluturuar brenda 20 kilometrave të kufijve të Rusisë. “Perëndimi nuk po i merr seriozisht paralajmërimet e Rusisë për të mos i kaluar “vijat e kuqe”, u shpreh ai. në deklaratën e ministries rusë theksohet se dy bombarduesit me rreze të gjatë veprimi, Tu-95MS, kryen një fluturim të planifikuar në hapësirën ajrore mbi ujërat neutrale të Ngushticës së Beringut, Detit Chukchi dhe Detit Okhotsk. Marrëdhëniet mes SHBA-së e Rusisë janë përkeqësuar ndjeshëm kohët e fundit. Washingtoni e akuzon Moskën për sjellje kërcënuese ndaj Ukrainës, ndërsa Rusia sheh me shqetësim ato që i cilëson manovra provokuese të luftanijeve amerikane në Detin e Zi.