Përpjekjet për të zvogëluar varësinë e Europës ndaj energjisë ruse po materializohen shumë shpejt tashmë. Shtetet e Bashkuara dhe Bashkimi Europian arritën një marrëveshje madhore për gazin e lëngshëm natyror, e cila parashikon që 15 miliardë metra kub shtesë të gazit të lëngshëm natyror të dërgohen nga Amerika drejt bllokut europian deri në fund të vitit. BE-ja e ka dekalruar tashmë se do të ndalë përdorimin e gazit rus, si përgjigje ndaj pushtimit rus në Ukrainë. Kjo nënkupton për rrjedhojë një rritje të importeve dhe vëmendje më të madhe tek energjia e ripërtëritëshme. Washingtoni ka insistuar me kohë se varësia e saj e madhe ndaj gazit rus, po e dobëson Europën. SHBA-ja vetë është një nga prodhuesit më të mëdhenj të gazit natyror dhe eksportuesit më të mëdhenj të gazit të lëngshëm në botë, kjo falë edhe metodës së frakingut, e cila ka qenë shumë e diskutueshme nga ana tjetër për arsye mjedisore. Procesi përfshin injektimin e një përzierjeje uji, rëre dhe kimikatesh në tokë, dhe kështu lirohet vaj ose gaz. Shtetet e Bashkuara i kanë rritur tashmë eksportet e gazit të lëngshëm në Europë në javët e fundit. Por Gjermania psh nuk do të përfitonte dot menjëherë nga ky gaz, sepse nuk ka asnjë terminal për LNG.