Fermerët spërkatën me pleh organik zyrat qeveritare dhe vazhduan bllokimet e rrugëve në Francën jugore, në një protestë kundër vrasjes masive të lopëve, ndërsa zyrtarët i kërkuan kryeministrit Sebastien Lecornu të ndërhynte urgjentisht. Shumë fermerë në Francën jugore dhe jugperëndimore janë zemëruar nga përdorimi i forcës policore dhe politika e qeverisë për vrasjen masive të bagëtive për të frenuar përhapjen e dermatitit nodular, i njohur gjerësisht si sëmundja e lëkurës me gunga. Fermerët kanë bllokuar rrugët pasi veterinerët të premten masakruan një tufë me më shumë se 200 lopë në një fshat pranë kufirit spanjoll, pasi zbuluan një rast të vetëm të sëmundjes. Policia kishte përdorur gaz lotsjellës për të larguar demonstruesit e zemëruar që mbronin bagëtinë. "Bllokada të reja janë ngritur", tha për AFP Bertrand Venteau, kreu i sindikatës së fermerëve Coordination Rurale. "Protesta vazhdon dhe po zgjerohet", shtoi ai.