Presidenti ukrainas, Volodymyr Zelensky dhe të dërguar amerikanë kanë zhvilluar negociata për më shumë se pesë orë në Berlin, pa sinjale për ndonjë rezultat të mundshëm, duke thënë vetëm se bisedimet do të vazhdojnë edhe të hënën. “Përfaqësuesit kanë zhvilluar diskutime për sa i takon planit të paqes prej 20-pikash, për agjendën ekonomike edhe më tepër. Është arritur shumë përparim dhe do të ketë takim sërish nesër në mëngjes”, tha i dërguari i Shtëpisë së Bardhë, Steve Ëitkoff përmes një postimi në X, të dielën vonë. Zelensky planifikohet të takohet edhe me zyrtarë të lartë evropianë, liderët e Gjermanisë, Britanisë dhe Francës. Ende nuk është bërë e qartë nëse këto diskutime do të zhvillohen ndaras, apo të kombinuara me diskutimet SHBA-Ukrainë. Dmytro Lytvyn, zëdhënës i Zyrës Presidenciale të Ukrainës, ka konfirmuar rinisjen e bisedimeve të hënën. Para nisjes së takimeve, Zelensky ka sugjeruar se Ukraina do të heqë dorë nga aspiratat për t’u anëtarësuar në NATO, në këmbim të garancive perëndimore të sigurisë. Megjithatë, heqja dorë nga NATO-ja nuk është vendim i lehtë për Zelenskyn, pasi anëtarësimi në aleancë është një synim i përfshirë në Kushtetutën e Ukrainës. “Prej fillimit, dëshira e Ukrainës ka qenë t’i bashkohet NATO-s, këto janë garanci reale të sigurisë”, tha Zelensky për gazetarët. “Disa partnerë nga Shtetet e Bashkuara dhe Evropa nuk e përkrahin këtë drejtim. Prandaj, garancitë bilaterale të sigurisë mes Ukrainës dhe SHBA-së, garanci të stilit të Artikullit 5, dhe garancitë e sigurisë nga kolegët evropianë, si dhe nga shtetet tjera, Kanadaja dhe Japonia, janë mundësi për të parandaluar një tjetër pushtim rus”, tha ai.