Gripi i shpendëve është rishfaqur duke mbjellë aq shumë shqetësim në Francë, sa i ka detyruar autoritetet atje ta rrisin nivelin e rrezikut prej sëmundjes nga “i moderuar” në “të lartë”. MInistria e Bujqësisë urdhëroi fermat që t’i mbajnë zogjtë në ambiente të brendshme, për të frenuar përhaojen e infeksionit që po ndodh në fakt, me ritme të shpejta. Influenza Avian, e njohur shpesh si gripi i shpezëve, ka rezultuar me asgjësimin e qindra miliona zogjve në gjithë botën, vitet e fundit. Ajo zakonisht përhapet në vjeshtë dhe dimër dhe është identifikuar në shumë shtete evropiane në javët e fundit, përfshirë Gjermaninë, Holandën dhe Belgjikën. Franca e identifikoi javën e kaluar rastin e parë të ri të virusit në një zonë në veriperëndim të vendit. Rritja e nivelit të rrezikut nënkupton se të gjithë shpezët duhet të mbahen në ambiente të mbyllura dhe duhet të merren masa mbrojtëse shtesë për ta shmangur përhapjen e sëmundjes. Gripi i shpendëve, i njohur edhe si virusi H5N1, u shfaq së pari në vitin 2003 dhe u pasua nga asgjesimi i rreth 100 milion shpendëve në Azi, veçanërisht në Vietnam. Humbjet njerezore dhe ekonomikeprej tij në kohë janë konsideruar si shkatërrimtare. “Kjo nuk është diçka e re. Transferimi i sëmundjeve nga kafshët tek njerëzit ka ndodhur që prej fillimit të njerëzimit. Por arsyet e prirjeve të reja tani janë globalizimi, ndryshimi klimatik, lëvizja e popullsisë, globalizimi i prodhimeve blegtorale, e të tjera. Çdo vit, shfaqet një sëmundje e re dhe 75 përqind e këtyre sëmundjeve e kanë origjinën tek kafshët”, shprehen ekspertet, sipas të cilëve, edhe globalizimi e ka shtuar mundësinë e përhapjes së sëmundjeve.